Ever Given բեռնարկղային նավի` ծանծաղուտում հայտնվելու պատճառով օրեր շարունակ Սուեզի ջրանցքի արգելափակման հետևանքով հասցված ընդհանուր վնասի չափը կարող է կազմել մոտ 1 միլիարդ ԱՄՆ դոլար:
Այս մասին հայտարարել է ջրանցքի վարչակազմի ղեկավար Ուսամա Ռաբիան, գրում է «ՌԻԱ Նովոստի»-ն:
«Մենք կշարունակենք հաշվարկել, հաշվի կառնենք դեպքի առաջին օրվանից օգտագործված ամեն բան, շուրջօրյա ռեժիմով աշխատած քարշակների և բեռնատար նավերի աշխատանքի վրա ծախսված ֆինանսական միջոցները»,- ասել է Ռաբիան և հավելել՝ խոսքը մոտ 1 միլիարդ ԱՄՆ դոլարի մասին է:
Ավելի վաղ Ռաբիան հայտարարել էր, որ արգելափակման ընթացքում ջրանցքի վարչակազմը կրել է օրական մոտ 15 միլիոն դոլարի վնաս: Նշվում է՝ այս դեպքում հիմնական փոխհատուցումը կվճարեն ապահովագրական ընկերությունները:
Հիշեցնենք՝ Պանամայի դրոշի ներքո նավարկող, 200 հազար տոննա փոխադրական ծավալով Ever Given բեռնարկղային նավը մարտի 23-ից ամբողջովին արգելափակել էր երթևեկությունը Սուեզի ջրանցքի հարավում:
Ըստ սոցիալական ցանցերում տարածված լուսանկարների` Չինաստանից Հոլանդիայի Ռոտերդամ նավահանգիստ ուղևորվող նավը կանգ էր առել ջրանցքի երկայնքով՝ արգելափակելով մնացած նավերի տեղաշարժը երկու ուղղությունով: Երեկ հայտնի է դարձել, որ երթևեկությունը ջրանցքով արդեն լիարժեք վերականգնված է երկու ուղղությունով: