Եգիպտոսի կենտրոնում երկու գնացքների բախման արդյունքում զոհվել է առնվազն 32 մարդ, 91-ը վիրավորվել, հայտնում են Եգիպտոսի առողջապահության նախարարության պաշտոնյաները:
«Անհայտ անձինք» գործարկել են արտակարգ իրավիճակների արգելակներ գնացքներից մեկի վրա, ինչի պատճառով այն կանգ է առել: Երկրորդ գնացքը, որն ուղևորվում էր նույն ուղղությամբ, հետևից բախվել է առաջինին։
Դատախազությունը հայտնել է, որ հրահանգել է հետաքննություն վարել պատահարի առթիվ, որը տեղի է ունեցել Նեղոս գետի ափին գտնվող Տահտա քաղաքին մոտ, Կահիրեից մոտ 365 կմ (230 մղոն) հարավ:
Եգիպտոսի նախագահ Աբդել Ֆաթթահ ալ-Սիսին, իր պաշտոնական էջում կատարած հայտարարության մեջ ցավակցել է վթարի զոհերի հարազատներին և հայտնել, որ պատասխանատուները կպատժվեն: Սիսին նաև վարչապետ Մոստաֆա Մադբուլիին ասել է, որ առողջապահության և սոցիալական համերաշխության նախարարների հետ ուղևորվի աղետի վայր:
